Dadi maa Chuni wi ..by Jameela(Writing Competition)

bachpan ji ghal aaye jadi asan her jume jo dadi gahr weian waye tade jume jo chuti ouni wi,dadi maa je ghare asaan k bouj maja achni wi,ou asaan k kahanion sunraini wi,juna qisa sunraini wi,sanjhi me bo bo rupiya deni wi ne foi maan k chui chui ne asaan je le mithaan(mithai)banaraini wi.
mike dadi maa ji ghalion bou pasand wion.unje wate bo ghaaj wa buj pyara akhro halke gulabi rang jo ne akro pista colour jo.boun je mathe jeegh ji bharat thiel wi,Dadi ma chuni wi k ee soun ji bharat aye ne unje maa ee pote kaarhi wi.jade asaan bade bachion bai bhenra ramnaye wa ne gudien ji shadi karna waye tu bouj aaram se poteji patrey ji paiti me se boun ghaaj nikari ne gude ji ne guddi je maa k deini wi.Wianhro hera Ghaaj udhan ou chuni wi.asaan ghanri badi bachion waye mijhe nandhi bhenr ji mijhi foi ji chokri se akhro di larai thi wi boun k ou ghaaj khapno wo.asaan wadi bachion un di dadi k chuaye k ko aayein je wate boj ghaaj ayein marho wadhere ghaaj sanbhari ne rakhe na,tade dadi ma mijhe nandhi bhenr k poteji goud me gini ne chui hal aoun toke akhri kahani sunraya.
 Asaan badi bachio bhi dadi maa je jhole wate wai wiye k halo aj pacho dadi maa koi pariyein ji kahani sunraini.lekin ouu taa koi alag aj kahani wi.
dadi maa kahani shru kari,akre dafa ji ghaal aaye bo bhenron wion,aapas me bouj pyaar ho,akhre be je wina koi kam me ine k halnoj na wo.boyein bhenron aayein bachien wanre ramat bi karnion wion.ineje wate bi ghanraj ramokra wa,gudion wion jade ou wadion thion taan ineja maa pay ineje wihan te ineke ghanraj lugra diniya,sonje satoun dinya.ne Ghaaj taan hera k jo bhi kaam wo bade sone ne chandi je dorein se jo sitara wa bade son ne chandi ja.Shadion pehla aaj jehri na ouni wion seedhi saadi shadion ouni wion dhi k maan pe jo deniya deniya baqi bade bhega thia dulhe dulhan k heri cheej dinya jo ineke kam ache,akni jardo bano wo shadien me ya ahrij akhri aadhi cheej seedha sadha sa log ouna wa banawat taa koi me na ouni wi.boun bhenro wiahen je baad bhi roj milniyo wion akhre be je wina one k halnoij kida wo.Boyein ji saara khilna wa k hanre taan wadi thi wi yu poteje ghar ji yu per une boun ji taa muhabat heri  wi k na pocho.
yeh 1947 je wate wate ji ghaal ouni haalaat sara na wa.Wadi bhenr ja saara Pakistan winan jo faislo kari giniya ne nandhi bhenr je gharwara Dhoraji chadal le raji na waa.Bade ghar baar ote wo,Karobaar ote wo.
Boun bhenre jo taa jo haal wo.kuro karan kuro na karan.
Achanak akhre di wadi bhenr ja suro ne awa ne chuwa kaal paan k nikarnoye.koi k khaas bataran ji jarorrat ne k paan kein ne kade winaye.wadi bhenr k taan jein sap aj kapi wio.potejo ghar wo itre pyar se banelo,akhri akhri jaga shoq ne pyar se sajaili wi.ne chadno wo,aghiya kida rehno aaye klein khabar na wi,pehle taa on jo dhian ghar te wo,pache sochan mandi k Pakistan wini ne khabar ne kam kuro karnaye ite taan karobar wathelo wo,rone rone cheejon rakhan mandi..Per bade se wadhi jin ghaal te rouni wi oo taa nandhi bhenr k chadi ne wino wo.sawar sawar jade ae log nikarna wa on ji nandhi bhenr aawi ne akhri nandhi si gulaabi gathri me kein deini,jaldi jaldi me wadi bhenr ou jo thoro saman khanri wi un me wiji dini ne boun gale mile nili ne ron mandio.kein khabar na wi aghiya kuro thino pacho kade akhre be k narnion.
Pakistan pojhi ne ghanri di baad wadi bhenr ou gathri kholi gulabi gathri je ander akhri bii gathri wi leele rang ji ne oun me inji bhenr potejo soun bandhi ne deini wi.ne akhro kagar wo.jin te likhal wo k nawo ghaam nawi duniya toke jaroor poni.jade milnaye taan in se widho gini ginis to wiadhi na karij.wadi bhenr boyein  ghaaj k naari gulaabi ne leelo ee ou ghaaj wa jo unji maan wadi bhenr je nikaah je time banai wi ne nandhi bhenr k itra ghamia wa k ou poteja boun ghaaj nandhi bhenr k di deni wi.
Dadi maa je hath me oh  bounj ghaaj wa ne akhien me paanri wo.hanre asaan k khabr pi k ou ee boyein ghaaj k kule hein sanbhanri sanbhari ne rakhni wi.

Dadi maa Chuni wi ..by Muhammad Iqbal A Khanani(Writing Competition)

Dadi maa Chuni wi ..by Farhana Owais(Writing Competition)

Asan nandha waye taan asan k bouj maja achni wi jade asan ji dadi maa asan k poteje zamane ji ghalion batarni wi.Asan bade kaka mama ja bacha bhega thi ne wenaye waye ne dadi asan k gudi gola bi deni wi ne sari srai ghalion bhi batarni wi

Akhri kahani ou aksar surayan karni wi,ne sunrayeine surayeine ron bi mandni wi.dadi chuni wi k uneje baapa jo ghar bouj wado wo ne ou log Bantva me Rehna wa,bachpan me taa ou log hindu oun k musalman bade bha bha banre rehna wa,dadi ji ghanri sehlion bi hindu wion per ahste ashte halat badlan mandiya.jo pehla bade bhag arehna wa akhre bie se tharkan lagiya,dadi maa jo whian bhi hereij halaat me thio wo nawi nawi shadi thi wi jade pakistan banayein ji ghalion thinion shru theion wion.dada pe aksar jalse ne juloos me halya wina wa,dadi k taan kein khas samjh na poni wi lekin achank thore arse baad ghar chadi ne bie kida winan ji ghalion thein mandion dadi maa bouj pareshan thi.tareekhon taa dadi maa k yaad nathio rehn per shayad ou 1947 jo zamano ij ouno jo dadi batarni wi k kutiyana asan je watejo ilaqo wo ne akhri raat othe bouj lout phaat thi ne ute humlo thio

asan bantve me tharki tharki ne wathaye waye tade mijhe bapa ne aawa ne chuwa k saman jo khanri skao khanro ne sawar me mijhe akhre dost je khutunmb bhego aayein log bhi nikri wino asaan wase achi winaye,dadi taa ee sunri bouj roni k bhaa bhenrein bade k chadi hein kein wina per baapa ne mijha dada pe uneke samjhaya k jo jein nikre sakke nikri wine.

rone dhune mijhe wade kaka jo oun time bo war ja wa k goud me jhali ne dadi son rup jo tjoro bor gine skai wi gini ne akhri gathri hath me jhali ne pakistan achal le nikre,chupne chupaine ae log karachi kheriat se pojhiya dada pe ji koi se aurkhanr wi ou ine logon k poteje ghar me tehraya ghanra di baad ine jo poteje ghar jo intijaam thio per dadi ja maa pe anna bhi na poghiya wa daddi taa bas royaaj karni wi

k akhro dein ine k tara milyo poteje baapo jo ou log achi wiya we ne nandho so gahr jo bandobast bhi kari ginya wa dadi taa ee ghar desi desi ne roni wi pehle ta inejo ghar bouj wado wo per dadi ja baapa bouj raji waa k poteje mulk taa pojhi wia hanre ine ke koi se tharko ta ne paisa ne ghar taan pacho achi wino

Dadi jade bi ee qiso sunraine wi bhego bhego roni wi tade asan nandha waye samjhi na saknaye waye aj khabar poeti k kitri mushkil se ee mulk banyou ne diso paan injo kuro haal kari riya youn